आ–आफ्नो घरमा सुरक्षित तरिकाले चाडपर्व मनाउन नगर प्रमुख रावतको आग्रह

बिधुत्मा रैका,
कोहलपुर, कार्तिक ५,

बाँकेको कोहलपुर नगरपालिकाका प्रमुख लूट बहादुर रावतले यसवर्षको दशैं, तिहार आ–आफ्नो घरमा बसेर सुरक्षित तरिकाले मनाउन आग्रह गरेका छन् ।

नगर प्रमुख रावतले जो जहाँ छौं त्यहि बसेर सुरक्षित तरिकाले दशैं, तिहार मनाउन आग्रह गरेका हुन् । उनले कोरोनाको प्रभावका कारण बाहिर जानसक्ने अवस्था नरहेका कारण सबैले आ–आफ्नै घरमा आफ्नो परिवार मात्रै बसेर दशैं मनाउन अपिल गरे ।

कोहलपुर नगरपालिका तथा व्यक्तिगत तर्फबाट हिन्दु नेपालीहरुको महान पर्व दशैं, तिहार तथा छट पर्वको शुभकामना दिदैं प्रमुख रावतले कोरोना भाईरस कोभिड–१९ को प्रकोप कायमै भएका कारण दशैं मान्न तथा टिका थाप्न एक ठाउँबाट अर्काे ठाउँमा नजान सबैलाई सूचित गराएका छन् । उनले भने,–‘विश्वभर महामारीका रुपमा फैलिरहेको कोभिड–१९ को प्रकोपले हामी प्रभावित भएका छौ । यस विषम परिस्थितीमा दशैंको बाहनामा कोरोना संक्रमण तथा फैलावट धेरै हुन सक्ने भएकोले घरमै बस्नु होला ।’ उनले हाल कोरोनाको विषयले आफूलाई चिन्तित बनाएको भन्दै यसको रोकथाम तथा नियन्त्रणका लागि साथ दिन आग्रह गरे ।

रावतले कोरोना व्यवस्थापनका लागि दिनरात लागि परेको बताए । उनी भन्छन्,–‘दशैं तिहार जस्तो महान पर्व सधै जस्तो हाँसी खुशीका तरिकाले मनाउने गरेका थियौ । तर यस वर्ष त्यस्तो अवस्था रहेको छैन । बाँच्यौ भने अर्काे वर्ष मनाउँला ।’ उनले अनावश्यक रुपमा घर बाहिर ननिस्कन, भिडभाड नगर्न, पूजा पाठ गर्ने काम नगर्न भनेका छन् ।

नगर प्रमुख रावतले सम्पूर्ण हिन्दु नेपाली दाजुभाइ दिदिबिहीनीलाई वडा दशैं, शुभ दिपावली तथा छट पर्वको अवसरमा सुख, शान्ति, समृद्धिका साथै उत्तरउत्तर प्रगतीको कामना गर्दै हार्दिक शुभकामना व्यक्त गरेका छन् ।

Leave a Reply

Your email address will not be published. Required fields are marked *