जनवरी १२ मा पत्रकार महासंघ युएईले दशौं वार्षिकोत्सव मनाउने

१ पुष, २०७४
युएई : नेपाल पत्रकार महासंघ युएई शाखाले दशौं वाषिर्कोत्सव भव्यताका साथ मनाउने भएको छ ।

आगामी जनवरी १२ तारिख शुक्रबार दुबईमा एक विशेष औपचारिक कार्यक्रम गरी नेपाल पत्रकार महासंघ, युएई शाखाले आधारभूत तथा विशेष पत्रकारिता तालिम आयोजना गर्ने भएको छ । सोही कार्यक्रममा एफएनजे युएई अवार्ड वितरण पनि हुने कार्यतालिका रहेको छ ।

कार्यक्रममा प्रमुख अतिथिका रुपमा सन् २००७ मा शाखाको उद्घाटन गर्न आएका खोज पत्रकारिता केन्द्रका सम्पादक शिव गाउँले १० वर्षपछि दोहोर्याएर युएई आउने भएका छन् । नेपाल पत्रकार महासंघका पूर्वअध्यक्ष समेत रहेका गाउँलेले युएईमा क्रियाशील सञ्चारकर्मीलाई मुख्य प्रशिक्षकमा रुपमा खोज पत्रकारिताका साथ साथै आधारभूत समचार लेखन तथा दक्षता अभिवृद्धि तालिम प्रदान गर्ने महासंघको युएई शाखाका अध्यक्ष भूपराज बस्यालले जानकारी दिए ।

तालिम संयोजनका लागि महासंघ युएई शाखाका उपाध्यक्ष लक्ष्मण खनालको संयोजकत्वमा ५ सदस्यीय एक समिति गठन गरिएको छ । पत्रकारिता तालिममा भाग लिन युएईमा रहेका इच्छुक सबैलाई आहृवान गरिएको संयोजक खनालले अनलाइनखबरलाई बताएका छन् ।

दशौं वार्षिकोत्सवको अवसरमा युएईको नेपाली पत्रकारिता क्षेत्रमा क्रियाशील एक पत्रकारको सम्मान स्वरुप गत वर्षदेखि प्रदान गरिँदै आएको एफएनजे युएई अवार्ड सोही दिन प्रदान गरिने भएको छ । यसका लागि महासंघका अध्यक्ष बस्याल र सचिव मेघराज सापकोटालाई महासंघको बैठकले जिम्मेवारी प्रदान गरेको छ ।

युएईमा क्रियाशील सञ्चारकर्मीहरुले समाचार संकलन, लेखन, सम्पादन, प्रकाशन र प्रशारणमा मात्र होइन, युएईको सामाजिक जीवनमा पनि प्रत्यक्ष योगदान गरिरहेका छन् ।

 

Leave a Reply

Your email address will not be published. Required fields are marked *