देशको नेतृत्व गर्न आफुहरू तयार–रवीन्द्र मिश्र

काठमाण्डौं, २३ मंसिर,

विवेकशील साझा पार्टीका संयोजक तथा काठमाण्डौं क्षेत्र नं. १ का उम्मेदवार रवीन्द मिश्रले मत परिणामबारे आफ्नो फेसबुक पेजमा प्रेस विज्ञप्ती जारी गर्दै अर्को पटकको चुनावपश्चात यो देशको नेतृत्वका लागि आफुहरूलाई तयार पार्नु चुनौति हुने बताएका छन् ।

उनले सबै यो प्रेस विज्ञप्ती सबैलाईलाई प्रचार प्रसार गर्नका लागि आग्रह गर्दै आफ्ना प्रतिद्वन्द्वी प्रकाशमान श्रेष्ठलाई बधाइ दिएको पनि बताएका छन् ।
उनले विज्ञप्तीमा भनेका छन्–“काठमाडौं क्षेत्र नं १ बाट मेरोभन्दा ८१९ मत बढी लेराएर लगातार तेस्रो पटक विजयी हुनुभएका नेपाली कांग्रेसका नेता प्रकाशमान सिँहलाई मैले एकैछिन अघि फोन गरेर बधाई तथा शुभकामना दिएको छु ।”

उनले जारी गरेको प्रेस विज्ञप्ती जस्ताको त्यस्तै

प्रेस विज्ञप्ती

“विवेकशील साझा पार्टीको तर्फबाट मैले काठमाडौं क्षेत्र नं १ मा प्रतिनिधिसभाका लागि दिएको उमेदवारीमा मलाई विश्वास गर्ने मतदाताहरू, नेपालभित्र र बाहिर रहेका सम्पूर्ण शुभेच्छुक, समर्थक, स्वयंसेवी, संचारकर्मी, सुरक्षाकर्मी तथा निर्वाचन आयोगप्रति हार्दिक आभार प्रकट गर्न चाहन्छु ।

काठमाडौं क्षेत्र नं १ बाट मेरोभन्दा ८१९ मत बढी लेराएर लगातार तेस्रो पटक विजयी हुनुभएका नेपाली कांग्रेसका नेता प्रकाशमान सिँहलाई मैले एकैछिन अघि फोन गरेर बधाई तथा शुभकामना दिएको छु ।

विवेकशील साझा पार्टी निर्माणको प्रक्रिया सुरु भएको ४ महिनामैं विना सङ्गठन उमेदवारी दिँदा पनि म लगायत हाम्रो पार्टीलाई भरपर्दो विकल्पका रूपमा हेरिएको तथ्यलाई मैले अत्यन्तै उत्साहजनकरूपमा लिएको छु ।

“यो पटक राष्ट्रिय पार्टी, अर्को पटक देशको नेतृत्व” नाराका साथ चुनावमा होमिएको विवेकशील साझाले राष्ट्रिय पार्टी बन्न प्रत्यक्षतर्फ कम्तिमा एउटा सिट जित्नु र समानुपातिकतर्फ कम्तिमा ३ प्रतिशत मत प्राप्त गर्नु पर्ने थियो। समानुपातिकतर्फ विवेकशील साझाले सोचेभन्दा बढी मत हासिल गर्ने अपेक्षा गरेका छौं ।

समष्टिगतरूपमा भन्नुपर्दा, नेपालको राजनीतिक इतिहासमा यति छोटो समयमा संभवत: कुनै पनि पार्टी यसरी राजनीतिमा उदाएको थिएन। अब देशभरी अभिव्यक्त सदभावलाई संगठनमा बदलेर अर्को चुनावपश्चात् यो देशको नेतृत्व गर्नका लागि आफुहरूलाई तयार पार्नु हाम्रो चुनौति हुनेछ ।

यो देश बनाएरै छोड्ने हाम्रो अठोटमा भविष्यमा पनि सबैको साथ र समर्थन रहने छ भन्नेमा हामी विश्वस्त छौँ। गरेरै छोड्ने हो, परिवर्तन हेरेरै मर्ने हो!

रवीन्द्र मिश्र
उमेदवार, काठमाडौं क्षेत्र नं १
संयोजक, विवेकशील साझा पार्टी”

(प्रेस विज्ञप्ती रवीन्द्र मिश्रको फेसबुक पेजबाट साभार)

कांग्रेस नेता प्रकाशमान सिंहले १० हजार ९ सय ३६ मत प्राप्त गरेका छन् भने विवेकशील साझाका रवीन्द्र मिश्रले १० हजार १ सय १८ मत प्राप्त गरेका छन् ।

Leave a Reply

Your email address will not be published. Required fields are marked *