कथाकार शाहलाई पूर्णिमा साहित्य रत्न, मोमिलाको एकल कविता वाचन

कोहलपुर, २० मंसिर,
हाम्रो पूर्णिमा साहित्य प्रतिष्ठान कोहलपुरले प्रत्येक वर्ष प्रदान गर्दै आएको पूर्णिमा साहित्य रत्न पुरस्कार यस वर्ष कथाकार महेश विक्रम शाहलाई प्रदान गर्ने निणर्य गरेको छ ।

साहित्य सेवामा लामो समयदेखि योगदान गर्दै महत्वपूर्ण कृतिहरु प्रकाशन गरेबापत कथाकार महेश विक्रम शाहलाई यो सम्मान प्रदान गर्न लागेको आयोजकले बताएको छ ।

वि.सं. २०६९ सालमा स्थापना गरिएको रु. ११००० राशीको यो पुरस्कार हरेक वर्ष प्रदान गरिदै आएको छ । यस पुरस्कारबाट हालसम्म कवि, गीतकार तथा गायक प्रेम प्रकाश मल्ल ‘मधुकर’, कथाकार सनत रेग्मी र कवि तथा गीतकार दिनेश अधिकारी सम्मानित भएका छन् ।

आगामी पुष १ गते एक भब्य कार्यक्रमका बिच यो पुरस्कार प्रदान गरिने प्रतिष्ठानका सचिव पुष्कर रिजाल ‘पुष्प’ले इआवाजलाई बताए । उनले पश्चिमको साहित्यलाई केन्द्रको साहित्यसँग जोड्न प्रष्तिठान लागि परेको पनि बताए । कथाकार शाहको सिपाहीकी स्वास्नी, छापामारको छोरो, अफ्रिकन अमिगो, ज्याक्सन हाइट लगायतका कृतिहरु प्रकाशित भएका छन् ।

पुरस्कार वितरणसँगै कवि मोमिला जोशीको एकल कविता वाचन कार्यक्रम रहेको आयोजकले बताएको छ । समकालिन कवितामा अब्बल मानिएकी कवि जोशीको एकल कविता वाचनले पश्चिमका कवितामा कलम चलाउनेहरुलाई अझै सजिलो हुने प्रतिष्ठानका अध्यक्ष महानन्द ढकालले बताए ।

कवि मोमिला जोशीका पैयुँ फुल्न थालेपछि, नीलो नीलो आकाश र दुई थोपा आँसु, जूनकीरीहरू ओर्लिरहेछन्, दुर्गम उचाइमा फूलको आँधी (कविता संग्रह), ईश्वरको अदालतमा आउटसाइडरको बयान (ललित निबन्ध संग्रह) लगायत थुप्रै कृतिहरु प्रकाशित भएका छन् ।

प्रतिष्ठानका अध्यक्ष ढकालले विशेष गरि यस्ता कार्यक्रमहरुले स्थानीय स्रष्टाहरुको लेखनमा परिपक्वता तथा निखारता आउने बताए ।

Leave a Reply

Your email address will not be published. Required fields are marked *